Dünyanın ən varlı adamından milyardlarla dollarlıq vəd – ABŞ da hər uşağa bir səhm

Dünən, 11:31

Amerikalı milyarder, Tesla və SpaceX şirkətlərinin rəhbəri İlon Mask (Elon Musk) 2027-ci ildə ABŞ-da yaşayan hər bir uşağa SpaceX şirkətinin bir səhmini hədiyyə edəcəyini vəd edib. Mövcud səhm qiymətləri əsasında təşəbbüsün ümumi dəyərinin 10 milyard dolları keçəcəyi gözlənilir.
Mask bu barədə sahibi olduğu X sosial şəbəkəsində paylaşım edib.
“Gələn il Amerikadakı hər uşağa SpaceX səhmlərimdən birini verəcəyəm. Bu, atılacaq çoxsaylı addımların birincisi olacaq”, – deyə milyarder bildirib.
Maskın açıqlaması süni intellekt sahəsində fəaliyyət göstərən Anthropic şirkətinin səhmlərinin 5 faizini ictimai fayda məqsədilə yaradılacaq xüsusi fonda ayırmaq qərarından sonra gəlib.
Hər uşağa təxminən 146 dollarlıq səhm veriləcək
Bloomberg-in məlumatlarına görə, SpaceX-in dövriyyədə təxminən 8,1 milyard səhmi mövcuddur.
Şirkətin səhmlərinin qiyməti oktyabrın 16-da keçirilən hərracların yekununda təxminən 146 dollar təşkil edib.
ABŞ-da 18 yaşına çatmamış uşaqların sayının təxminən 72-73 milyon olduğu nəzərə alınarsa, Maskın vəd etdiyi səhmlərin ümumi bazar dəyəri 10,5-10,7 milyard dollar səviyyəsində qiymətləndirilir.
Bununla belə, səhmlərin uşaqlara hansı mexanizmlə veriləcəyi, kimlərin proqramdan yararlana biləcəyi və paylanmanın necə təşkil olunacağı hələ açıqlanmayıb.
Anthropic səhmlərinin 5 faizini ictimai faydaya ayırır
Maskın təşəbbüsü süni intellekt şirkəti Anthropic-in elan etdiyi genişmiqyaslı xeyriyyə planına cavab kimi qiymətləndirilir.
Claude süni intellekt modelinin yaradıcısı olan Anthropic səhmlərinin 5 faizini yeni yaradılacaq İctimai Fayda Fonduna (Public Benefit Fund) yönəltməyi planlaşdırır.

Fondun vəsaitlərindən qeyri-kommersiya təşkilatlarının dəstəklənməsi, müəyyən əhali qruplarına birbaşa maliyyə yardımlarının göstərilməsi və süni intellektin əmək bazarında yaratdığı dəyişikliklərin mənfi təsirlərinin azaldılması məqsədilə istifadə edilməsi nəzərdə tutulur.

Anthropic-in açıqlamasına münasibət bildirən Mask səhmlərin xüsusi fond vasitəsilə deyil, birbaşa ictimaiyyətə paylanmasını təklif edib.
Bundan sonra milyarder öz SpaceX səhmlərini amerikalı uşaqlara vermək niyyətində olduğunu açıqlayıb.
Maskın sərvəti 900 milyard dolları ötür
Bloomberg Milyarderlər İndeksinə əsasən, İlon Mask 900 milyard dollardan çox sərvətlə dünyanın ən zəngin insanı olaraq qalır. Onun sərvətinin əsas hissəsi SpaceX-dəki səhmlərindən formalaşır. Şirkətdə sahib olduğu payın dəyəri təxminən 700 milyard dollar qiymətləndirilir. Milyarderin digər əsas aktivləri arasında Tesla, The Boring Company və Neuralink şirkətlərindəki investisiyaları yer alır. Bununla yanaşı, Maskın əvvəllər də sonradan həyata keçirilməyən və ya zarafat kimi təqdim olunan təşəbbüslərlə çıxış etdiyi məlumdur.
Hazırda təşəbbüsün konkret icra mexanizmi və hüquqi şərtləri məlum deyil. Buna görə də səhmlərin paylanması hələlik rəsmi icra mərhələsinə keçmiş proqram deyil, Maskın ictimaiyyətə açıqladığı vəd olaraq qalır./Marja.az