Dalana dirənmiş “MTN işi” davam etdiriləcək – zərərçəkənin şikayəti
Dünən, 14:59 27 dəfə baxılıb
Sabah-30 yanvarda Bakı Apellyasiya Məhkəməsində “MTN işi” üzrə zərərçəkənlərin bir qisminin şikayətinə baxılacaq. Vaxtilə yolu MTN-dən düşmüş, bu gün də məhkəmə qapılarında qalan şikayətçilər deyir ki, Nərimanov Rayon Məhkəməsində icraçıların qanunsuz və əsassız, cinayətə bərabər qərarlarını heç bir əsas olmadan qüvvədə saxlayıblar. Düşünüblər ki, apellyasiya instansiyasında illər sonra nəhayət, ədalətli qərar alacaqlar. Lakin apellyasiya şikayətlərinə baxılarkən də qanunsuz verilmiş qərarın qüvvədə saxlanılması üçün Bakı Apellyasiya Məhkəməsinin sədri Mübariz Əkbərov işə qanunsuz müdaxilə etməsi və ilkin instansiyada çıxarılan qərarın qüvvədə saxlanılmasında maraqlı tərəf kimi çıxış etməsini müşahidə ediblər. Zərərçəkənlər bunu deməkdən çəkinmir və hətta Mübariz Əkbərovun özünə də bu barədə şikayətlərində yazıblar.Bakı Apellyasiya Məhkəməsi isə bu iddianı təkzib edir.
“MTN işi” üzrə zərərçəkən Hüseyn Səfərov Musavat.com-a demişdi ki, şikayətlərinə baxılarkən qanunsuzluqlara yol veriləcəyindən narahatdırlar. Onun sözlərindən məlum olmuşdu ki, Nərimanov Rayon Məhkəməsində çıxarılmış qanunsuz və əsassız qərarın apellyasiya instansiyasında da heç bir əsas olmadan qüvvədə saxlanılacağı barədə qarşı tərəfdən məlumat alıblar. Ona görə də Bakı Apellyasiya Məhkəməsinin sədri Mübariz Əkbərovun qanunsuzluqlara şərait yaratmasına etiraz edib, bununla bağlı ölkə rəhbərliyinə, Ali Məhkəmə sədrinə və digər səlahiyyət sahiblərinə yazılı müraciət etməklə tədbir görülməsini istəyiblər. Hüseyn Səfərov veriləcək qanunsuz qərara etiraz olaraq məhkəmə binası önündə intihar edəcəyini də açıqlamışdı. Demişdi ki, Bakı Apellyasiya Məhkəməsində baş verən qanunsuzluqlar, məhkəmə sədrinin prosesə qanunsuz müdaxiləsi onları intihar həddinə gətirib.
Onun sözlərindən sitat: “İllər öncə MTN-də başımıza açılan oyunları bu gün Bakı Apellyasiya Məhkəməsində Mübariz Əkbərov davam etdirir. Mübariz Əkbərov Bakı Hərbi Məhkəməsinin zərərçəkənlərə vurulmuş ziyanın qarşılanması haqda qərarında göstərilən növbəlilik prinsipinə məhəl qoymayan Nərimanov Rayon Məhkəmə icraçılarının özbaşına, Bakı Hərbi Məhkəməsinin qərarını heçə sayan əməllərinə qanuni don geyindirməyə həvəslənib. Bu qanunsuzluq baş verərsə, mən Mübariz Əkbərovun cinayətə bərabər qərarına etiraz olaraq Bakı Hərbi Məhkəməsinin önündə intihar edəcəyəm. Bizə başqa yol qoymurlar”.
Zərərçəkənlərin apellyasiya instansiyasına təqdim etdikləri şikayət ərizəsində Nərimanov Rayon Məhkəmə icraçılarının Bakı Hərbi Məhkəməsinin hökmünü bir kənara tullayıb icra işini öz maraqlarına uyğun şəkildə, qanunsuz icra etmələrinin qarşısının alınmasını tələb edirlər. Deyirlər ki, sosial şəbəkədə Nərimanov Rayon Məhkəməsində üzləşdikləri qanunsuzluq barədə çıxışlar etdikdən sonra məhkəmə sədrinin köməkçisi Emin telefonla Hüseyn Səfərovla əlaqə saxlayıb. Ona “burada (Nərimanov Rayon Məhkəməsində) qəbul edilmiş qərarın üzərində dayanacağam və nə qədər lazımdırsa, pul verib apellyasiyada da qərarı qüvvədə saxlayacağam” deyib. Zərərçəkənlər qeyd edirlər ki, şikayətləri üzrə Bakı Apellyasiya Məhkəməsində keçirilən proseslərdə Nərimanov Məhkəmə sədrinin köməkçisinin sözlərinin həyata keçəcəyini müşahidə ediblər. Bakı Apellyasiya Məhkəməsində keçirilən məhkəmə prosesinin obyektivliyinə və şəffaflığına ciddi şübhələr yarandığından sədr Mübariz Əkbərova yazılı müraciət etməklə qanunsuzluqların önlənməsini xahiş ediblər. Hüseyn Səfərov demişdi ki, Mövlam Şıxəliyev və digərlərinin işi üzrə 2023-cü ilin mart ayında Bakı Hərbi Məhkəməsi və Bakı Apellyasiya Məhkəməsinin qərarları qanuni qüvvəsini alıb. Bundan sonra qərar üzrə icra sənədi Nərimanov Rayon İcra Şöbəsinə təqdim edilib. Lakin bu qərarın icrası məqsədli şəkildə ləngidilib, icra məmurları şəxsi maraqlarına uyğun hərəkət edib və qərarların qanunsuz şəkildə dəyişdirilməsi üçün müdaxilələrə yol veriblər. Buna görə də Nərimanov Məhkəməsinə müraciət etməklə icra məmurlarının qanunsuzluğuna son verilməsi tələbi ilə çıxış ediblər. Nərimanov Məhkəməsi şikayətlərini təmin etməyib. Ona görə də ölkə rəhbərliyindən xahiş ediblər ki, işin şəffaf və qanuni qaydada araşdırılması təmin olunsun. Bakı Apellyasiya Məhkəməsindəki qanunsuz müdaxilələrə son qoyulması üçün göstəriş verilsin. Hüseyn Səfərov baş verən qanunsuzluqlardan sarsıldığını, intihar həddinə çatdırıldığını və elə məhkəmə binası önündəcə baş verənlərə etiraz olaraq intihar edəcəyini də gizlətmir. O, baş verənlərlə bağlı video vəsiyyət hazırladığını, qanunsuzluq edən hər kəsin əməllərini vəsiyyətində sadaladığını qeyd edib.
Qeyd edək ki, Mövlam Şıxəliyev MTN İstintaq Baş İdarəsinin rəisi vəzifəsində çalışdığı 2008-2014-cü illərdə şöbə rəisi Vüsal Ələkbərov, İbtidai istintaq idarəsinin rəis müavini Yasin Məmmədov, şöbə rəisinin müavini Sahib Ələkbərov ilə mütəşəkkil dəstə tərkibində iş adamlarından hədə-qorxu yolu ilə külli miqdarda pul tələb etməkdə ittiham olunurlar. İttihamda bildirilib ki, Mövlam Şıxəliyev mütəşəkkil dəstə halında ümumilikdə 14 milyon 292 min manat məbləğində pul vəsaitini rüşvət qismində, 5 milyon 77 min manat məbləğində özgə əmlakını hədə-qorxu ilə tələb edərək alıb, həmçinin səlahiyyət həddini aşmasında və sübutların saxtalaşdırmasında da təqsirli bilinib. 21 sentyabr 2022-ci ildə, iş üzrə Bakı Hərbi Məhkəməsində çıxarılıb. 2023-cü ilin aprelində isə Mövlam Şıxəliyev general-mayor, digərləri polkovnik rütbələrindən məhrum edilməklə əsgər rütbəsinə endiriliblər. Bakı Hərbi Məhkəməsinin hökmünə əsasən keçmiş şöbə rəislərindən Vüsal Ələkbərov 11 il 2 ay, Yasin Məmmədov 10 il 6 ay, rəis müavini Sahib Ələkbərov isə 8 il azadlıqdan məhrum ediliblər. Bakı Apellyasiya Məhkəməsi 2023-cü ilin sentyabrında Mövlam Şixəliyev və nazirliyin istintaq idarəsinin rəis müavini, 1-ci şöbənin rəisi Yasin Məmmədov, istintaq idarəsinin 2-ci şöbəsinin rəisi polkovnik Vüsal Ələkbərov və istintaq idarəsinin metodiki yardım və kriminalistika şöbəsinin rəis müavini Sahib Ələkbərovla bağlı hökmdən verilmiş protest və şikayətlər üzrə qərar vermişdi. Qərara əsasən, Bakı Hərbi Məhkəməsinin hökmü qüvvədə saxlanılıb. Hakim İlqar Murquzovun səsləndirdiyi qərara əsasən prokurorun verdiyi protest və tərəflərin şikayətləri əsassız hesab olunaraq rədd olunmuşdu. Bakı Apellyasiya Məhkəməsinə apellyasiya şikayəti təqdim edən Mövlam Şıxəliyevlə suç ortaqları bəraət istəyirdilər. Bundan başqa, Mövlam Şıxəliyevin ailə üzvləri də, prokuror da, iş üzrə zərərçəkənlər də apellyasiya instansiyasına şikayətlərini təqdim etmişdilər. Mövlam Şıxəliyevlə tabeliyində işləmiş, onunla birgə mühakimə olunan şöbə rəislərinin, dövlət ittihamçısının, zərərçəkənlərin narazı qaldığı qərardan Ali Məhkəməyə kassasiya şikayəti vermişdilər. İş üzrə ibtidai istintaq zamanı Mövlam Şıxəliyev və ailə üzvlərinin - həyat yoldaşı Aybəniz Şıxəliyeva, oğlu Elgün Şıxəliyev, qızı Samirə Əliyevanın adına olan, 7 milyon manatdan çox dəyəri olan əmlakların üzərinə həbs qoyulmuşdu. Bakı Hərbi Məhkəməsində çıxarılan hökmlə Mövlam Şıxəliyevin ailə üzvlərinə məxsus əmlaklar geri qaytarılıb. Bu isə təxminən 3 milyon 500 min manatlıq əmlak deməkdir. Şıxəliyevin ailə üzvlərinə qaytarılan əmlaklar arasında Bakının mərkəzində - “Sahil” metrostansiyasının üstündəki binada 8 mənzil, Fəvvarələr meydanında, Nizami küçəsində, Ağdaşda evlər, obyektlər, Novxanıda bağ evi və başqa əmlaklar var. Bakı Hərbi Məhkəməsinin hökmündən zərərçəkmişləri narazı salan əsas məqam da məhz bu idi. Onlar Mövlam Şıxəliyevin ailə üzvlərinin adına olan, üzərinə həbs qoyulmuş əmlakların əhəmiyyətli bir hissəsinin geri qaytarılmasından narazı idilər. Baş Prokurorluq da bu qərardan narazı idi, cinayət yolu ilə əldə olunan əmlakların müsadirəsi tələb olunurdu. Zərərçəkənlər vaxtilə MTN-də onlardan və yaxınlarından hədə-qorxu ilə alınmış pulların geri qaytarılması tələbi ilə Bakı Hərbi Məhkəməsində baş tutan prosesin əvvəlində mülki iddialar qaldırmışdılar. Bununla yanaşı, Mövlam Şıxəliyevin ailə üzvlərinin də cinayət yolu ilə əldə olunmuş əmlakların leqallaşmasında iştirak etdiklərinə görə cinayət məsuliyyətinə cəlb olunmaları üçün vəsatətlə çıxış etmişdilər. Məhkəmə vəsatətləri baxılmamış saxlasa da, zərərçəkənlərdən mülki iddia qaldırmış 16 nəfərin iddiasını təmin edib.
Musavat.com
Xəbəri paylaş
