“Medilife” klinikasına müayinəyə gedən gənc öldü – Foto

 

Yanvar ayının 21-də günaorta saatlarında müayinə üçün getdiyi klinikada həkimlərin etdiyi müayinədən sonra dünyasını dəyişən 36 yaşlı Ceyhun Süleymanovun ölüm səbəbi ilə bağlı 7 gündür ailəsinə məlumat verilmir.
Tribunainfo.az xəbər verir ki, bu barədə mərhumun həyat yoldaşı sosial şəbəkədə yazaraq hüquqşünaslardan kömək istəyib. O bildirib ki, həyat yoldaşı C.Süleymanov müayinə üçün öz ayağıyla Sabunçu rayonunda yerləşən “Stimul” klinikasına gedib. Oradan isə onu “Medilife” klinikasına göndəriblər:
“Yoldaşım 1988-ci il təvəllüdlü Ceyhun Süleymanov Akif oğlu 21 yanvar səhər saatlarında, Bakıxanov qəsəbəsində yerləşən “Stimul” klinikasına müayinə üçün müraciət edir. Orada olduğu müddətdə təzyiqi aşağı düşür və oranın həkimləri onun özünü dərman almaq üçün aptekə göndərirlər. Yoldaşımın həmin “Stimul” klinikasına getməyi bağırsağıyla bağlı olub. Müayinə olunmaq məqsədilə “Stimul” klinikasına gedib. Klinikada narkoz həkimi olmadığı üçün həmin ərazidə yerləşən “Medilife” klinikasına yönləndirirlər. Həmin klinikada yoldaşımın bağırsaqları yoxlanması üçün heç bir analiz edilmədən, həkim yoxlanışı edilmədən dərhal bağırsağını 3-4 dəfə yuyurlar. Günorta saat 14:00-15:00 radələrində yoldaşım anasına zəng edir və anasına deyir ki, mən bu klinikadayam narahat olmayın, yaxşıyam, heç bir yerim ağrımır, tam yuyulub təmizlənəndən sonra baxacaqlar mənə, sonra gələcəyəm evə.
Hətta həmin ərəfədə palatada özünü videoya da çəkib. Ondan sonra ondan xəbər alınmır. Onunla gedən dostunun dediyinə görə evlə danışandan sonra yene bağırsağı yuyulur və bundan sonra klinikanın dəhlizində həkimlər təşvişlə ora-bura qaçırlar ki, bəs xəstə ayılmır.
21.01.2025 tarixindən bu günə qədər bizə yoldaşımın hansı səbəbdən dünyasını dəyişməsi barədə həmin klinikadan məlumat verilməyib. Aidiyyəti qrumlardan, xüsusilə yoldaşımın ölümü ilə əlaqədər bu işi aparan Sabunçu Rayon Prokurorluğundan, Səhiyyə Nazirliyindən, TƏBİB-dən və ümumiyyətlə bu işlə bağlı araşdırma apara biləcək qurumlardan artıq dərəcədə təvəqqe edirəm ki, iki azyaşlı övladlarımla və mərhum yoldaşımın hər iki xəstə valideyni ilə düşdüyümüz naəlac vəziyyətimizə ETİNASIZ VƏ LAQEYİD yanaşılmasın.
Bu ölüm işində təqsirkar və səbəbəkar olan hər kəs araşdırılaraq cəzalandırılsın. Mənim səhhətimlə bağlı problemlərim var. Heç bir yerdə işləmirəm. Qaynatam və qaynanam ağır xəsdədir. Evimizdə yeganə işləyən şəxs yoldaşım idi. Aidiyyəti qrumlardan çox xahiş edirəm, mənə kömək edəsiniz və mənim 11-12 yaşlı övladlarımın gözüyaşlı qalmalarının səbəbkarlarının kimliyi müəyyənləşsin”.
Yazıda adı çəkilən tərəflərin mövqeyini işıqlandırmağa hazırıq.

---

---