Satışından milyonlar qazanılan İŞ DƏFTƏRLƏRİ - Valideyn onları almağa məcburdur?

 

Yeni tədris ilinin başlanmasına az vaxt qaldığı üçün məktəb alış-verişlərinə də başlanılıb. Valideynlər hər il olduğu kimi, bu il də məktəb ləvazimatlarıyla yanaşı, iş dəftərlərinə də xeyli pul sərf edirlər.
Əyalətmedia.az xəbər verir ki, bizim.media-ya açıqlama verən valideyn Xuraman Ələkbərzadə deyib ki, onun iki övladı var və buna görə də hər uşaq üçün iş dəftərlərinə ayrıca pul verir.
“Ötən il bir övladım üçün 4 iş dəftərinə 13 manat, ümumi olaraq 2 uşaq üçün isə 30 manata yaxın pul ödədim. Hər uşaq üçün 2 riyaziyyat, 2 azərbaycan dili iş dəftəri alıram. Bunun səbəbi isə fənlərin 2 hissəli olmasıdır. Yəni, 1-ci hissə bitdikdən sonra 2-ci hissənin iş dəftərinə keçilir”.
Bəs hər il tələbatın böyük olduğu iş dəftərlərinin önəmi nədir? Bu vəsaitlər şagirdlərə həqiqətən lazımdır?
Məsələylə bağlı təhsil eksperti Elşən Qafarov bildirib ki, iş dəftərləri dərsliklərdəki mövzular üzrə əlavə tapşırıqlar, didaktik materiallardır:
“2013-cü ildə təhsilin inkişafı üzrə Dövlət Strategiyasında qəbul edildi ki, ümumi orta təhsil səviyyəsində hər bir şagird planşetlə təmin edilsin, dərsliklər, iş dəftərləri həmin planşetə daxil olsun. Ancaq çox təəsüf ki, biz onu yerinə yetirə bilmədik”, - deyə ekspert qeyd edib.
Elşən Qafarovun sözlərinə görə, iş dəftəri əlavə vəsait olduğu üçün şagirdin bilik və bacarıqlara daha yaxşı yiyələnməsinə kömək edir və burada müəllim hansı müəllifin vəsaitini bəyənsə, onu məsləhət görür".
İş dəftərlərini almaq məcburiyyətdir?
Bu məsələyə gəlincə ekspert qeyd edib ki, iş dəftərlərinin alınması ilə bağlı məcburiyyət yoxdur.

---

---