Avropa ÇALXALANIR - Daha bir ölkədə böhran

 

Rumıniyada baş verən siyasi qarşıdurma artıq təkcə bu ölkə ilə məhdudlaşmır və Avropa üçün də ciddi nəticələr vəd edir.

Musavat.com xəbər verir ki, "Politico" saytında dərc olunan geniş təhlildə analitik Tim Ross Rumıniyada yaranmış siyasi böhranın həm ölkə daxilində, həm də Avropa Birliyi üçün mümkün nəticələrini analiz edib . Məqalədə qeyd olunur ki, Rumıniyada hakim koalisiyanın dağılması təhlükəsi yaranıb. Baş nazir İlie Bolojanın rəhbərlik etdiyi hökumətə qarşı etimadsızlıq səsverməsi gündəmdədir. Bu təşəbbüs ifrat sağçı siyasətçi Corc Simion və onun rəhbərlik etdiyi AUR partiyası tərəfindən irəli sürülüb.

Böhranın mərkəzində isə Bolojanın sərt iqtisadi siyasəti dayanır. Onun koalisiya tərəfdaşı olan Sosial Demokrat Partiyası hökumətdən çıxaraq baş nazirin istefasını tələb edib. Partiyanın lideri Sorin Qrindeanu Bolojanın vergi artımı və maaşların dondurulması kimi tədbirlərini qəbul etmir. Ekspertlər xəbərdarlıq edir ki, bu proses ifrat sağın legitimləşməsinə gətirib çıxara bilər. Buxarestdə yerləşən Milli Siyasi Araşdırmalar Universitetinin professoru Kristian Pırvulesku bu cür əməkdaşlığın “demokratiya üçün təhlükəli” olduğunu deyib.
Rumıniyada baş verənlər Avropa üçün də mühüm əhəmiyyət daşıyır. Təxminən 19 milyon əhalisi olan ölkə Avropa Birliyi daxilində böyük oyunçulardan biridir və Ukrayna ilə sərhəddə yerləşməsi səbəbilə strateji rol oynayır. Eyni zamanda, Rumıniya Qara dəniz sahilində NATO-nun ən böyük hərbi bazasının tikintisini həyata keçirir və regionun təhlükəsizliyində əsas ölkələrdən hesab olunur.
Analitik Radu Maqdinə görə, siyasi qeyri-sabitlik iqtisadi riskləri də artırır. Onun sözlərinə görə, ölkə Avropa Birliyindən təxminən 11 milyard avro maliyyə vəsaiti əldə etmək üçün vacib islahatları vaxtında həyata keçirməlidir. Əks halda kredit reytinqinin aşağı düşməsi ehtimalı var.

Digər mühüm məqam isə ifrat sağın güclənməsidir. Simionun rəhbərlik etdiyi qüvvələr artıq sorğularda yüksək nəticə göstərir və hakimiyyətə gələcəyi təqdirdə Ukraynaya dəstəyi dayandıra, həmçinin Brüsselin təsirinə qarşı çıxa bilər. Rumıniya prezidenti Nikuşor Dan isə vəziyyəti sabitləşdirməyə çalışır və yeni hökumət formalaşdırmaq üçün siyasi qüvvələrlə məsləhətləşmələr aparmağa hazırdır.

Məqalədə qeyd olunur ki, qarşıdakı günlərdə keçiriləcək etimadsızlıq səsverməsi Rumıniyanın siyasi gələcəyini müəyyən edə bilər. Hökumətin devrilməsi ölkəni yeni koalisiya axtarışına sürükləyəcək, əks halda isə azlıq hökuməti formalaşa bilər. Yazının ümumi nəticəsinə görə, Rumıniyada baş verənlər yalnız daxili siyasi böhran deyil — bu proses Avropa Birliyinin sabitliyi, Ukraynaya dəstək və regionun təhlükəsizliyi baxımından da ciddi əhəmiyyət daşıyır.

---

---