Fulser Bakıya qarşı şəbəkəni ifşa etdi

 

Qlobal güclərin maliyyələşdirdiyi media Azərbaycan və Türkiyəyə iqlim, təbiət, ədalət və insan haqları mövzusunda təzyiq göstərməyə çalışır. Beynəlxalq Əfv Təşkilatı, BBC, “Human Rights Watch”, VOA, “Greenpeace” kimi qrupların niyəsə dünyanı çirkləndirənlərlə bağlı deyil, bizlərlə bağlı mənfi təəssürat yaratmaq istədiyini görürük.
Bu sözləri türkiyəli araşdırmaçı yazar Cahan Fulser COP29-la bağlı aparılan qaralama kampaniyasına münasibət bildirərkən deyib.
O bildirib ki, X platformasında özəyi Amerikada yerləşən, erməni lobbisinin rəhbərliyi altında fəaliyyət göstərən və COP29-a qarşı kampaniya aparan ANCA adlı struktur ifşa olunub:
“Bu strukturun Amerika və Fransa qollarındakı “jurnalist” və “tədqiqatçılar” lobbilərin maliyyə dəstəyi ilə COP29 iclaslarını müxtəlif bəhanələrlə manipulyasiya edir, ləğv etdirməyə çalışırlar. Bu müstəvidə də Azərbaycana təzyiq göstərməyə cəhd edən böhtançı lobbilərin fürsətçi qələmləri yalan xəbərlər yayır. “Amnesty”, “Conflict and Environment Observatory”, “Quardian”ın ətraf mühit üzrə redaktoru Fiona Harvey, “Human Rights Watch” , “Myrto Tilianaki”, “Unilever”in keçmiş baş direktoru Paul Polman, eləcə də “Alisdare Hickson/Creative Commons”, “PassBlue”, “Anay Mridul”, “Greenqueen” saytlarının il ərzində Azərbaycanla bağlı qaralama kampaniyası apardıqlarını, böhtan xarakterli xəbərlər yaydıqlarını unutmamalıyıq. Konfransın keçirilmə tarixi yaxınlaşdıqca məqalələrin manipulyasiya şiddəti və intensivliyi artır. Onların yazdıqlarını izlədim, sübutlar gətirərək səhvlərini düzəltmələrini xahiş etdim. Lakin bu qruplardan müsbət cavab ala bilmədim.
Ona görə də populist eynəkdən baxaraq, məyus olmaq əvəzinə, oyunu real məqsədlər və ambisiyalarla tərtib edən oyunçu kimi davranmalıyıq. Azərbaycan dövləti böhtan, şantaj kimi variantlar qarşısında qəddini əyməməklə yanaşı, öz perspektivini, onlarla mübarizə üsullarını da inkişaf etdirib”.

---

---