Sabunçu rayonunda sakinlər yaşadıqları ərazidə hündürmərtəbəli bina tikmək istənilməsinə etiraz edirlər. "Azərbaycan Reallığı"na müraciət edən Bakıxanov qəsəbəsi, Novruz Novruzov küçəsində yaşayan sakinlərin sözlərinə görə, sözügedən ərazi onların maşın saxladığı, uşaqların oynadığı və xeyir-şər olarsa palatka qura biləcəyi sahədir.Sakinlərin iddiasına görə, ARAZ MTK həmin ərazidə hündürmərtəbəli bina tikmək niyyətindədir. Videoda da göründüyü kimi, yeni bina yaxınlıqda yaşayan evlərin bir neçə metrliyində tikiləcək və bu, onların həyatını riskə atır. Sakinlər bildirir ki, tikinti illərlə davam edə bilər, gecələr əraziyə tikinti materialları gətirilir, maşınlar saxlanılır və onlar gecə növbə çəkərək ərazini qorumağa çalışırlar.Tikintini aparmaq istəyən şəxsin Namazov Faiq Mirzalı oğlu olduğu iddia edilir. Sakinlər qeyd edirlər ki, o, Bakı Dövlət Universitetində müəllim işləyir. Onlar müvafiq qurumlardan məsələyə dərhal müdaxilə etmələrini xahış edirlər.Qeyd edək ki, media materiallarına əsasən, Sabunçu rayonunda illərdir qanunsuz tikililərlə bağlı müxtəlif reportajlara rast gəlmək mümkündür. Rayonun icra başçısı 10 ildən artıqdır ki, Adil Vəliyevdir.Qarşı tərəfində mövqeyini dərc etməyə hazırıq