“Araz” harda, cərimə orda!” – Cərimələr, şikayətlər monopolist şirkəti “yolundan” döndərə bilmir

 

2011-ci ildən Azərbaycanın pərakəndə satış bazarına “sən harda, Araz orda!” şüarı ilə daxil olan “Araz Supermarket” Məhdud Məsuliyyətli Cəmiyyəti (MMC) “Veysəloğlu” Şirkətlər Qrupunun əsas hissəsini təşkil edir.

İlkin dövrdə paytaxtda 4 supermarket açan MMC-nin hazırda Azərbaycanın bir çox şəhər və rayonlarını da əhatə edən 400-dən artıq filialı, 11 mindən artıq işçisi var. Bu göstəricilərlə “Araz” bütün rəqiblərini qabaqlayır və günü-gündən filiallarının sayını artırmaqda davam edir.

“Araz Supermarket” təkcə bu göstəriciləri ilə deyil, başqa parametrlərə görə də rəqiblərindən öndə gedir.

Məsələn, Azərbaycanda dövlət nəzarət qurumlarının, məhkəmələrin ən çox cərimə kəsdiyi pərakəndə satış şirkəti “Araz”-dır. Vətəndaşların da ən çox şikayətləri adıçəkilən supermarketlərdəndir.

Şikayətlərin xarakterinə gəldikdə, müştərilərin aldadılması, vaxtı keçmiş məhsulların satılması halları öndə gəlir. Bu barədə internet resurslarında çoxsaylı məlumatlara rast gəlmək mümkündür.

Qeyd edək ki, açıq mənbələrdə “Araz Supermarket” MMC-nin milyonlarla manat cərimələnməsi barədə xəbərlər yer alıb. Məsələn, 24 dekabr 2019 tarixində Yasamal rayon Məhkəməsi “Araz”-ın 6500 manat inzibati cərimə edilməsi barədə qərar çıxarıb.

MMC Ekologiya və Təbii Sərvətlər Nazirliyinin İnzibati Xətalar Məcəlləsinin 271-ci (sənaye və məişət tullantılarının qalaqlanması və yandırılması zamanı ətraf mühitin mühafizəsi tələblərinə əməl edilməməsi) maddəsi ilə yazdığı protokola əsasən təqsirli bilinib.

2022-ci il mayın 5-də mediada yer alan xəbərdə isə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin “Araz”-ın cərimələməsindən bəhs olunur.

Qeyd olunur ki, aparılan araşdırmalar nəticəsində ““Araz Supermarketlər” şəbəkəsi Yeni il ərəfəsində ən ucuz market seçildi” reklamının yayılmasında “Araz Supermarket” MMC-nin digər market şəbəkələrinə qarşı haqsız rəqabətə yol verməsi əlamətləri üzrə qaldırılan işə dair qərar qəbul edilib.

Qərara əsasən “Araz Supermarket” MMC-yə fəaliyyətində haqsız və qeyri-dəqiq reklam üsullarından istifadə olunmasına yol verməməsi haqqında icrası məcburi olan göstəriş verilib və haqsız rəqabət yol verdiyinə görə MMC-yə 2 milyon 484.6 min manat maliyyə sanksiyası tətbiq edilib.

Daha sonra 31 yanvar 2023-cü ildə Antiinhisar və İstehlak Bazarına Nəzarət Xidmətindən «Araz Supermarket» MMC-yə haqsız rəqabət halları, yəni qanunsuz reklamın yayımına yol verməməsi haqqında göstəriş verilib və 2,5 milyon manat maliyyə sanksiyası tətbiq edilib.

Dövlət Xidməti həmin ilin avqust ayında məhsulu üzərində göstərilmiş qiymətdən baha satdığına görə marketlər şəbəkəsi barəsində İnzibati Xətalar Məcəlləsinin (İXM) 447.0.1-ci maddəsinə əsasən cərimə protokolu tərtib edib.

2024-cü ilin 21 avqust tarixində də “Araz Supermarket” MMC-yə cərimə protokolu yazılıb. Marketlər şəbəkəsi barədə İnzibati Xətalar Məcəlləsinin 485.2-ci (Azərbaycan Respublikasının Gömrük Məcəlləsi ilə müəyyən edilmiş hallarda qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsi) maddəsi ilə inzibati protokol tərtib olunub və baxılması üçün Nəsimi Rayon Məhkəməsinə göndərilib.

27 avqustda “Araz”-a növbəti dəfə cərimə protokolu tərtib edilib. Marketin Binəqədi rayonu ərazisində yerləşən filialında aparılan yoxlama zamanı onun İnzibati Xətalar Məcəlləsinin ticarət qaydaları əleyhinə olan 447.0.1-ci maddəsini pozduğu məlum olub.

Belə ki, mal satan və ya əhaliyə xidmət göstərən şəxslər tərəfindən malın (xidmətin) ölçüsünə, çəkisinə, hesabına, habelə istehlak xüsusiyyətinə və ya keyfiyyətinə dair istehlakçıların az miqdarda aldadılmasına görə, fiziki şəxslər üç yüz əlli manatdan beş yüz manatadək məbləğdə, vəzifəli şəxslər min beş yüz manatdan iki min manatadək məbləğdə, hüquqi şəxslər dörd min manatdan altı min manatadək məbləğdə cərimə edilir.

Bu cür faktların sayı daha da uzatmaq olar. Belə məlum olur ki, şirkət pərakəndə satış bazarındakı monopolist mövqeyindən istifadə edərək qanunvericiliyi dəfələrlə pozmaqdan çəkinmir.

Cərimə sanksiyaları, məhkəmə qərarları, vətəndaşların şikayətləri də “Araz” MMC rəhbərliyinə kar eləmir.

O halda MMC-nin məşhur “sən harda, Araz orda!” şüarını dəyişib “Araz harda, cərimə orda!” yazmaq daha məntiqli görünür…
/gununsesi.info/

---

---