Bakının Ortasında "Göy Mülkü" Biabırçılığı: Qanunları Kim Belə Rahatlıqla Tapdalayır?

Bu gün, 12:13

Mediatvaz.com xəbər verir ki, Azərbaycanda tikinti sahəsində qanunların necə "yaradıcı" şəkildə tapdalandığını görmək istəyənlər üçün Binəqədi rayonu, Əcəmi Naxçıvani 21 ünvanına qısamüddətli bir ekskursiya bəs edir. Çox yox, başınızı bir az yuxarı qaldırıb 12 mərtəbəli yaşayış binasının damına baxmağınız kifayətdir. Bəli, səhv eşitmədiniz, binanın həyətində və ya boş sahədə yox, düz damının üstündə yeni bir mülk ucalır!

Video burada: https://www.tiktok.com/@duzsoztv/video/7654122138907053333?is_from_webapp=1&sender_device=pc

Təqdim etdiyimiz videoda aydın şəkildə görünən bu mənzərə, paytaxt Bakının mərkəzində qanunvericiliyin hansı yüksəklikdə "ayaqlar altına" atıldığının əyani sübutudur. Uzun illərdir istifadədə olan, yüzlərlə sakinin yaşadığı binanın damında kərpic-kərpic, taxta-taxta yeni bir "göy dələn" tikilir. Sanki şəhərdə torpaq qıtlığıdır, sanki bu şəxs özünə yerdə ev tikməyi şanına sığışdırmayıb və qərara gəlib ki, buludlara daha yaxın yaşasın. Bu tikintini aparan "cəsarətli" və toxunulmaz şəxs qanunları elə rahatlıqla, elə hamının gözü qarşısında tapdalayır ki, adamın lap bu soyuqqanlılığa heyranlığı artır.

Maraqlıdır: Bu hansı "gözəgörünməz" qüvvədir ki, 12 mərtəbəli binanın seysmik dayanıqlığını, sakinlərin can təhlükəsizliyini bir qəpiklik edib, özünə göydə mülk ucaldır? Üstəlik, bu biabırçılıq sözügedən ərazidə törədilən yeganə qanunsuzluq da deyil.

Yuxarıdakı fotolarda da aydın görünür ki, qonşuluqdakı binaların damında artıq analoji "göy mülkləri" çoxdan tamamlanıb və xeyli vaxtdır istifadəyə də verilib. Yəni, Binəqədidə bina üstündə qanunsuz qondarma mərtəbələr ucaltmaq artıq fərdi bir özbaşınalıq deyil, kütləvi bir "ənənəyə" çevrilib. İndi isə gələk bu fantastik mənzərələrə tamaşa edən, amma inadla "görməyən" məsul qurumlara. Siyahı rəngarəngdir, fəaliyyətsizlik isə vahid.

Məsələn, Binəqədi Rayon İcra Hakimiyyəti və yerli mənzil təsərrüfatı rəsmiləri heçmi başlarını yuxarı qaldırmırlar? Yoxsa binaların damındakı bu tikintiləri sadəcə "quş yuvası" zənn edirlər? Bütöv bir yaşayış sahələrinin ucaldılmasını və illərlə orada yaşanılmasını görməmək üçün adamın gözünə ciddi bir "gözbağlayıcı" çəkilməlidir. Tikintidə təhlükəsizliyə nəzarət etməli olan Fövqəladə Hallar Nazirliyi (FHN) isə yəqin ki, bu yeni tikilən obyekti də yalnız iş-işdən keçəndən və binanın bünövrəsi ağırlığa dözməyib çatlayandan sonra "kəşf edəcək". Binaların damı bütün sakinlərin ortaq mülkiyyəti olduğu halda, hansısa şəxslərin ora ağır konstruksiyalar yığması, pəncərələr açıb eyvanlar düzəltməsi hansı təhlükəsizlik və yanğın normasına sığır? Bakının arxitekturasına "göz bəbəyi" kimi baxan Dövlət Şəhərsalma və Arxitektura Komitəsi isə yəqin ki, bu eybəcərliyi "postmodernist memarlıq nümunəsi" kimi qəbul edir, yoxsa şəhərsalma nəzarətinin bu dərəcədə iflic olmasını başqa nə ilə izah etmək olar?

Bu mənzərə ölkədəki bəzi imtiyazlı şəxslərin qanunlardan nə qədər "yüksəkdə" dayandığının vizual təzahürüdür. Hər kəs bilsin ki, Əcəmi Naxçıvani küçəsində binaların üstündə ucalanlar sadəcə qanunsuz evlər deyil, həm də aidiyyəti qurumların məsuliyyətsizliyinin rəmzidir.

Mövzunu davam etdirəcəyik!

Görək qanunun gücü bu göydəki tikintilərə çatacaq, yoxsa qanunlarımız yerdə sürünməyə və tapdalanmağa devam edəcək?

Məsələ ilə bağlı aidiyyəti tərəflərin də mövqeyini işıqlandırmağa hazırıq.//DüzsözTv