Agentlik Bakıda, Gəncədə, Göygöldə mafioz şəbəkələrin izinə düşüb – Vətəndaşları belə zəhərləyirlər

Azərbaycanda birbaşa insanların həyatına yönəlmiş gizli cinayətlər baş verir. Bəzi ticarət obyektləri piştaxtalara içki deyil, ən müxtəlif adlar altında zəhərlə dolu şüşələr düzülür. Kimyəvi maddələrlə dolu olan bu məhsullar cəmiyyətin hər bir üzvü üçün real təhlükə mənbəyidir. Bu içkilərin bir qurtumu belə insanı kor edə, orqanları çökdürə, hətta ölümə aparan zəncirvari reaksiyanı bir neçə saatın içində yarada bilər.

Musavat.com xəbər verir ki, Azərbaycan Qida Təhlükəsizliyi Agentliyinin əməkdaşları tərəfindən ticarət obyektlərində yoxlama keçirilib. Baxış zamanı bir sıra mağazalarda müşayiətedici sənədləri olmayan, aşkar saxtalaşdırma əlamətləri olan müxtəlif əmtəə nişanlı alkoqollu içkilər aşkarlanıb. İçkilərin kustar üsullarla başlıq hissələrinin butulkalara təkrar bərkidildiyi, qablaşdırılmasının kəskin fərqləndiyi, etiket məlumatlarında istehsalçı və istehsal ünvanı barədə məlumatın olmadığı və saxta VÖEN göstərildiyi məlum olub. Belə ki, Gəncə şəhərinin Ş.İ.Xətai prospektində fəaliyyət göstərən fiziki şəxs Azər Ələkbər oğlu Abdullayevə məxsus mağazada “Naturel” və “Беленькая Водка”, Atatürk prospekti, ev 83 ünvanında fəaliyyət göstərən fiziki şəxs Elgün Aydın oğlu Ələkbərova məxsus mağazada “Ağsu”, Göygöl şəhərinin A.Kazımov küçəsində fəaliyyət göstərən fiziki şəxs Raqif Qədir oğlu Aslanova məxsus “Əkizlər” marketdə “Organic Brand”, Göygöl rayonunun Quşqara kəndində fəaliyyət göstərən fiziki şəxs Elçin Ələddin oğlu Abbasova məxsus “Çinar” marketdə “Premium Organic”, “Organic Росинка”, “Mypaва”, Aşıqlı kəndində fəaliyyət göstərən fiziki şəxs Cavid Şəmsəddin oğlu Quluyevə məxsus “Gilavar” marketdə “Organic Росинка”, Yeni Qızılca kəndində fəaliyyət göstərən fiziki şəxs Elnur Şahvələd oğlu Abdullayevə məxsus “BEH” marketdə “N1 Organic” əmtəə nişanlı saxta araqlar müəyyən edilib. Faktla bağlı qanunvericiliyə uyğun olaraq, içkilərin satışının qarşısı alınıb və möhürlənərək saxlanca verilib, nümunələr götürülərək müayinələrə cəlb olunub. Araşdırmalar davam etdirilir.
Saxta içki ölümə səbəb olarsa, onu hazırlayanların cəzası nədir? İçki zəhərlənmələri necə baş verir?
“Azad İstehlakçılar” Birliyinin sədri Eyyub Hüseynov Musavat.com-a deyib ki, saxta içkilər yalnız spirtli içki içənləri hədəf almır: “Bu məhsulların dövriyyəsi geniş mafioz şəbəkələrin maliyyə bazasını möhkəmləndirir, dövlətin vergi sisteminə zərbə vurur, insan həyatına qarşı açıq təhdiddir. Bu, artıq sağlamlıq yox, milli təhlükəsizlik məsələsidir. Zəhərlənmələr, korluq, daxili orqanların sıradan çıxması bu içkilərin real nəticələridir. Saxta araqların yaratdığı fəsadlar sadəcə mədə pozuntusu deyil. Bu içkilərdə metanolun payı yüksək olur. Beyin hüceyrələri kütləvi şəkildə məhv olur, görmə sinirləri sıradan çıxır, qaraciyər və böyrəklər çökməyə başlayır, ölüm adi gözlənilən sonluğa çevrilir. “Bilmirəm, mən satıram” dövrü qurtarmalıdır. Satıcılar da bu cinayətin ortaq iştirakçılarıdır.
"Ucuz alım, baha satım" prinsipi ilə insanların həyatını riskə atanlar cavab verməlidir”.


Eyyub Hüseynov deyib ki, alkoqollu içkilərdən zəhərlənmələrin qanunlardakı boşluqlarla birbaşa əlaqəsi var: “1995-ci ildə "İstehlakçıların hüquqlarının qorunması haqqında" Qanun qəbul edildi. Sonradan qanuna bir neçə dəfə dəyişikliklər olundu. Qanunu yerinə yetirməli olan dövlət orqanları fəaliyyətsizdir. Qida Təhlükəsizliyi Agentliyi qarşısına məqsəd qoyub ki, qidanın tarladan və ya fermadan istehlakçılarının süfrəsinə qədər nəzarət sistemi yaradılsın. Bu, çox mükəmməl sistemdir və öhdəsindən gəlmək də asan deyil. Dövlətin biznes qurumları üçün yaratdığı şəraitdən sui-istifadə var - dövlət biznes qurumlarına toxunulmaması siyasəti həyata keçirir. Hökumətin istehsalçılarla bağlı siyasəti ilə AQTA əsasnaməsi məntiqi olaraq bir-birini tamamlamır ".
Eyyub Hüseynov deyir ki, belə bir vəziyyətdə biznes qurumları istehlakçı hüquqlarına qəsd edir: “2022-ci ildə alkoqollu içkilərin istehsalı üçün lisenziyalar ləğv olundu. Bu, özlüyündə yaxşı haldır. Lakin sonra 18 şərab müəssisəsinə qarşı 96 araq istehsalı müəssisəsi açıldı. Heç bir məhdudiyyət yoxdur. Harada gəldi, necə gəldi, hansı spirtdən istəsələr araq istehsal edirlər. AQTA fiziki olaraq o qədər istehsal müəssisəsinə nəzarət edə bilməz. Hökumətin əsas strateji istiqaməti biznesin inkişafı ilə bağlıdır. İstehlakçı hüquqları isə tamam arxa plandadır. Təsadüfi deyil ki, Azərbaycan istehlakçıları apteklərdə, həkimlərdə növbələrdə duran istehlakçılardır. Azərbaycan insanı 190 ölkə içində qısa ömürlülüyü ilə 119-cu yerdə qərarlaşır. Azərbaycan istehlakçı hüquqlarının qorunmasında Afrika ölkələrindən belə geridə qalır. Bu  gün Azərbaycanda bazarda insan sağlamlığı üçün təhlükəli və ziyanlı olan çoxsaylı mallar var, o cümlədən də spirtli içkilər satılır”.
Eyyub Hüseynov deyib ki, bu gün heç kimə gizlin deyil ki, müxtəlif iaşə obyektlərində Rusiya arağı adı altında gizli sexlərdə hazırlanmış saxta məhsullar satılır: “Hətta kustar üsulla hazırlanan keyfiyyətsiz və təhlükəli araqların və yaxud digər spirtli içkilərin üzərinə məşhur markaların vurularaq baha qiymətə satılması faktları da var. Etiketləri ayırd etmək mümkündür, saxta etiketlər tam dəqiq, düz vurula bilmir, keyfiyyəti fərqlənir. Kustar üsulla, ev şəraitində hazırlanan məhsulun butulkasında, boğaz hissədə, qapağın yerləşdiyi yerdəki boşluq xəttində üzük formasında maska deyilən iz qalır, buna səbəb isə məhsul hazırlanarkən təmizlənmiş sudan istifadə edilməməsidir. Adi suyun tərkibində duz olduğuna görə orada iz buraxır. Zavod şəraitində isə su tamamilə duzdan təmizləndiyinə görə həmin iz qalmır, keyfiyyətli arağın rəngi ağ olur, aseton iyi verməməli, iyindən bilinməlidir”. 
Eyyub Hüseynov deyib ki, vaxtaşırı olaraq saxta içkiləri istehsal edənlərin ifşa edilməsi də vəziyyəti dəyişmək gücündə deyil: “Spirtli içkilərin də digər məhsullar kimi yararlılıq müddəti var. Məsələn, araqların yararlılıq müddəti bir ildən artıq deyil və yaxud konyaklar 3 il, şərabların isə 6 aydan artıq yararlılıq müddəti var. Lakin ölkənin əmtəə bazarında dəfələrlə apardığımız monitorinqlərdə şahidi olmuşuq ki, spirtli içkilərin demək olar ki, 90 faizinin üstündə yararlılıq müddəti yazılmayıb. "Spirtli içki uzun müddət qalanda daha yaxşı olar" anlayışı xüsusi şəraitdə, xüsusi qablarda, temperaturda saxlanılan məhsullara aiddir. Spirtli içkinin yararlılıq müddəti bitdikdən sonra onun tərkibindəki sivuş yağlarının miqdarı getdikcə artır və insanlar da bundan zəhərlənə bilir. Beləliklə, insanların sağlamlığının qorunması üçün bu sahədə daha ciddi işlər görülməlidir. Biznes qurumları üçün elə bir rahat şərait yaradılıb ki, onlara toxunmaq, yoxlamaq olmaz və onlar da bundan istifadə edərək zərərli spirtli içkilər hazırlayırlar".
Eyyub Hüseynov qeyd edib ki, saxta içkilər xarici ölkələrdən də Azərbaycana gətirilir: “Belə içkiləri qəbul edənlər ölümlə üz-üzə qalır, bəzi hallarda isə insanların həyatında sağalmaz izlər qoyur. Normal şəraitdə spirtli içkilər etil spirti ilə hazırlanır. Ancaq bəzi işbazlar daha çox qazanmaq məqsədilə içkiləri metil spirti ilə hazırlayırlar. Metil spirti isə zəhərlənməyə səbəb olur. Çünki metil spirti antifriz, şüşə təmizləyən məhlullar, boyanı durultmaq üçün nəzərdə tutulmuş vasitələr və bu kimi maddələrin hazırlanmasında istifadə edilir. Yəni metil spirti daxilə qəbul etmək üçün nəzərdə tutulmayıb. Metil spirtinin daxilə qəbul edilməsi zəhərlənməyə səbəb olur. Metil spirti bədəndə metobolizma nəticəsində formaldehid və formik turşuya çevrilir. Zəhərlənmə isə formik turşusunun yaratdığı asidozla əlaqəlidir. Asidoz nəticəsində sinirlər zədə görür və bununla əlaqəli korluq və yaxud ölüm baş verir. Zəhərlənmənin ilkin əlamətləri bunlardır: halsızlıq, ürəkbulanma, mədə-bağırsaq pozuntusu, temperaturun qalxması. Vətəndaşlara tövsiyə olunur ki, güvənmədikləri içkini, yeməyi qəbul etməsinlər”.